ABŞ Hindistana silah satışını təsdiqləyib

ABŞ Dövlət Departamenti Hindistana ümumi dəyəri 428,2 milyon dollar olan silah satışını təsdiqləyib. Satış paketinə Apache helikopterləri üçün texniki xidmət dəstəyi və müvafiq avadanlıqlar, həmçinin M777A2 Ultra Yüngül artilleriya silahlarının satışı daxildir. Apache helikopterləri üçün texniki xidmət dəstəyinin təxmini dəyəri 198,2 milyon dollar, M777A2 Ultra Yüngül Haubitsaların satışının təxmini dəyəri isə 230 milyon dollar olaraq göstərilib.
Açıqlamada bildirilib ki, bu satışlar ABŞ ilə Hindistan arasındakı strateji münasibətləri gücləndirəcək. Həmçinin Hindistanın mövcud və gələcək təhdidlərlə mübarizə imkanlarını artıracağı, ABŞ-nin xarici siyasət və milli təhlükəsizlik məqsədlərini dəstəkləyəcəyi qeyd olunub.

Hindistan Müdafiə Nazirliyi 27 martda Rusiyadan S-400 hava hücumundan müdafiə sistemlərini də əhatə edən 25 milyard dollarlıq yeni hərbi satınalma planını təsdiqləmişdi. Hindistan 2018-ci ildə Rusiya ilə imzaladığı 5,3 milyard dollarlıq S-400 razılaşması çərçivəsində 5 sistemdən 2-sini hələ təhvil almayıb. Rusiyadan S-400 hava hücumundan müdafiə sistemi almasına baxmayaraq, Hindistanın ABŞ ilə hərbi əlaqələri davam edir.