Si və Putin Pekində görüşüb

Çin Dövlət Sədri Si Cinpin və Rusiya Prezidenti Vladimir Putin rusiyalı liderin Çinə səfəri çərçivəsində Pekində görüşüb. Putin iki günlük səfər üçün ötən gecə Pekinə çatıb, bu gün isə Tiananmen meydanında dövlət mərasimi keçirilib. Mərasimdən sonra liderlər Böyük Xalq Zalında təkbətək və nümayəndə heyətləri arasında görüşlər keçiriblər.

Görüşdə 2001-ci ildə imzalanmış “Çin-Rusiya mehriban qonşuluq, dostluq və əməkdaşlıq haqqında saziş”in müddətinin uzadılması barədə razılıq əldə olunub. Çin Dövlət Sədri Si sazişin iki ölkə arasında davamlı dostluğun və strateji əməkdaşlığın əsasını təşkil etdiyini bildirib. Beynəlxalq mühitin sürətli dəyişikliklər və gücə əsaslanan münasibətlər təhlükəsi altında olduğunu vurğulayan Si sazişin əhəmiyyəti və uzaqgörənliyinin getdikcə artdığını qeyd edib. Çin sazişin uzadılmasını dəstəkləyərək qarşılıqlı strateji koordinasiyanın irəlilədilməsi üçün Rusiya ilə əməkdaşlığı davam etdirəcək.

Si həmçinin Yaxın Şərqdə davam edən toqquşmaların dərhal dayandırılmasına çağırış edərək, bölgədə müharibə və sülh arasında kritik dönüş nöqtəsində bütün tərəflərin danışıqlar masasına qayıtmalı olduğunu bildirib. O, toqquşmaların başa çatmasının enerji təchizatında yaşanan çətinlikləri yüngülləşdirəcəyinə, sənaye və beynəlxalq ticarətin nizamlı fəaliyyətini təmin edəcəyinə diqqət çəkib. Sülh təklifi kimi milli suverenlik, beynəlxalq hüququn aliliyi, təhlükəsizlik və inkişaf balansının təmin olunmalı olduğunu bildirib.

Putin isə Rusiya-Çin münasibətlərinin heç vaxt olmadığı qədər yüksək səviyyədə olduğunu, ticarət həcminin son 25 ildə 30 dəfə artdığını və son illərdə 200 milyard dolları keçdiyini söyləyib. Yaxın Şərq böhranının davam etdiyi bu dövrdə Rusiyanın enerji resursları sahəsində etibarlı təchizatçı, Çinin isə məsuliyyətli müştəri rolunu qoruduğunu bildirib. İki ölkənin beynəlxalq arenada sabitliyin əsas dayağı olduğunu qeyd edən Putin çoxqütblü dünya düzəninin formalaşdırılması istiqamətində irəliləməyə davam etdiklərini vurğulayıb.

Putin Çinlə BRİKS, Şanxay Əməkdaşlıq Təşkilatı (ŞƏT) və G20 kimi çoxtərəfli platformalarda yaxın əlaqə və əməkdaşlığı davam etdirəcəklərini ifadə edib. O, ŞƏT-in geniş coğrafiyada inteqrasiya və ortaq problemlərin həllində mühüm nümunə olduğunu bildirib. Bundan əlavə, Çinin Asiya-Sakit okean İqtisadi Əməkdaşlığına (APEC) ev sahibliyini dəstəklədiklərini və bu il Şençjendə keçiriləcək sammitə qatılacağını açıqlayıb. Putin çinli həmkarını gələn il rəsmi səfər üçün Rusiyaya dəvət edib.