Türkiyəyə köç edənlərdə azərbaycanlılar 2-ci sırada yer alıb

2025-ci ildə Türkiyəyə köç edənlərin sayı əvvəlki illə müqayisədə 25,2 faiz artaraq 393 min 829 nəfər olub. Köç edənlərin 56,6 faizini kişilər, 43,4 faizini isə qadınlar təşkil edib. Gələnlərin 91 min 952-si Türkiyə vətəndaşı, 301 min 877-si isə xarici vətəndaş kimi qeydə alınıb.

Eyni dövrdə Türkiyədən xaricə köç edənlərin sayı 5 faiz azalaraq 403 min 216 nəfər təşkil edib. Köç edənlərin 55,3 faizi kişilərdən, 44,7 faizi isə qadınlardan ibarət olub. Türkiyədən gedənlərin 155 min 119-u Türkiyə vətəndaşı, 248 min 97-si xarici vətəndaş kimi müəyyənləşdirilib.

Köç edənlərin yaş qruplarına nəzər saldıqda, Türkiyəyə gələnlər arasında 16,3 faizlə 20-24 yaş qrupu birinci yerdə qərarlaşıb. Bunu 13,7 faizlə 25-29 və 11,5 faizlə 30-34 yaş qrupları izləyib. Türkiyədən köç edənlər arasında isə 25-29 yaş qrupu 14,3 faizlə ən yüksək göstəricini təmsil edib.

İllərə görə bölgüdə Türkiyəyə köç edənlərin 42,2 faizi İstanbulda məskunlaşıb. İstanbulu 9,1 faizlə Antalya, 6,7 faizlə Ankara, 3,1 faizlə İzmir və 2,9 faizlə Bursa izləyib. Türkiyədən köç edənlərdə isə İstanbul 35,4 faizlə ən çox köç verən il kimi qeydə alınıb. Ankara, Antalya, Mersin və İzmir digər mühüm köç verən illər olub.

Xarici vətəndaşlar arasında ən çox köç alan ölkə Türkmənistan olub, köç edənlərin 23,4 faizi Türkmənistan vətəndaşıdır. Bu ölkəni müvafiq olaraq Azərbaycan (8,3 faiz), Özbəkistan (6,9 faiz), Misir (6,1 faiz) və Əfqanıstan (5,8 faiz) vətəndaşları izləyib. Türkiyədən köç edən xarici vətəndaşlar arasında isə ilk yerdə 15,7 faizlə İraq vətəndaşları gəlib. Onları müvafiq olaraq Əfqanıstan, Rusiya Federasiyası, İran və Türkmənistan vətəndaşları izləyib.