Anthropicin Fable5 modelinə olan qadağa ləğv edildi

Sİ şirkəti Anthropic ABŞ administrasiyasının Sİ modelləri “Claude Fable 5” və “Mythos 5” üzrə ixrac nəzarəti məhdudiyyətlərini qaldırdığını açıqlayıb. Ticarət Nazirliyinin hər iki modelə çıxış maneələrini aradan qaldırdığı bildirilib. Mythos modelinə dair məhdudiyyətlərin bir hissəsi 26 iyunda yumşaldılmışdı.

Anthropic Fable 5-i daha çox kibertəhlükəsizlik təhdidini aşkar etmək və önləmək məqsədilə yeni təsnifatçılar dəsti ilə yenidən istifadəyə verdiyini açıqlayıb. Şirkət Amazon, Microsoft, Google və Project Glasswing-dəki tərəfdaşları ilə birlikdə jailbreak cəhdlərini təhlil etmək və cavabları qiymətləndirmək üçün çərçivə hazırlamağa başlayıb.

Anthropic dünya üzrə istifadəçilərin bu platformalar vasitəsilə Fable 5-ə çıxışını təmin etdiyini bildirib. Şirkətin məlumatına görə, Amazon, Google və Microsoft bulud xidmətlərində bu modelin istifadəsinə ən qısa zamanda icazə veriləcək. Bundan başqa, Mythos 5 modelinə bəzi ABŞ qurumlarının yenidən çıxışı açılıb. Bu çıxış hüququ Vaşinqtonla əməkdaşlıq çərçivəsində daha çox yerli və beynəlxalq üzvə genişləndiriləcək.

ABŞ-ın ticarət naziri Howard Lutnick ABŞ hökuməti ilə uyğunluğu təmin etmək və “Amerikanın Sİ sahəsində liderliyini” gücləndirmək üçün Anthropic ilə yaxından işlədiklərini qeyd edib. ABŞ administrasiyası qabaqcıl Sİ modellərinin yarada biləcəyi potensial təhdidlərə qarşı nəzarəti sərtləşdirmişdi. Bu səbəbdən Anthropic 12 iyunda həm Mythos 5, həm də Fable 5 modellərini istifadəyə bağlamışdı. Ötən həftə isə Mythos 5 modelinə “etibarlı” qurumlar üçün çıxış icazəsi verilib.