DeepL real vaxt səs tərcüməsi platformasını təqdim edib

Tərcümə texnologiyaları üzrə ixtisaslaşmış DeepL real vaxt səsdən-səsə tərcümə (voice-to-voice) platformasını istifadəyə verib. Yeni həll görüşlər, mobil və veb ünsiyyət, eləcə də ön xətt işçiləri üçün qrup söhbətləri kimi istifadə ssenarilərini əhatə edir.

Şirkət eyni zamanda API təqdim edib ki, bu da xarici tərtibatçılara və bizneslərə DeepL texnologiyasını fərdiləşdirilmiş həllərdə, o cümlədən çağrı mərkəzləri kimi sahələrdə istifadə etməyə imkan yaradır.

DeepL-in baş icraçı direktoru Jarek Kutylowski bildirib ki, uzun illər mətn tərcüməsi sahəsində fəaliyyət göstərdikdən sonra səs texnologiyalarına keçid “təbii addım” olub. Onun sözlərinə görə əsas məqsəd real vaxt rejimində yüksək keyfiyyətli və aşağı gecikməli tərcümə sistemi yaratmaqdır.

Yeni sistem Zoom və Microsoft Teams kimi platformalara inteqrasiya olunur. İstifadəçilər ya danışılan nitqin canlı tərcüməsini dinləyə, ya da ekranda real vaxtda mətn tərcüməsini izləyə biləcəklər. Hazırda sistem erkən giriş mərhələsindədir və şirkət təşkilatları gözləmə siyahısına qoşulmağa dəvət edir.

Bununla yanaşı mobil və veb əsaslı həlllər vasitəsilə istifadəçilər həm canlı, həm də uzaqdan qrup söhbətlərində iştirak edə bilirlər. QR kod vasitəsilə qoşulma funksiyası isə təlim və seminar kimi tədbirlərdə istifadəni asanlaşdırır.

Şirkət sistemin sənayeyə məxsus terminologiyaya və korporativ adlara uyğunlaşa bildiyini, yəni istifadə etdikcə öyrənmə qabiliyyətinə malik olduğunu bildirib.

DeepL hazırda səs tərcümə prosesini mətnə çevirmə → tərcümə → səsə çevirmə mərhələləri üzərindən həyata keçirir. Lakin şirkət gələcəkdə bu prosesi birbaşa səsdən-səsə işləyən end-to-end modelə keçirməyi planlaşdırır.

Şirkət bu sahədə güclü rəqabətin olduğunu da qeyd edir. Məsələn, Sanas real vaxtda aksenti dəyişdirməyə fokuslanır, Camb.AI media üçün dublyaj və lokalizasiya həlləri təqdim edir, Palabra isə səsin orijinal tonunu qoruyaraq tərcümə edən sistem üzərində işləyir.