StanChart CEO-su: Sİ insan kapitalını əvəz edəcək

CEO Bill Winters bankın “aşağı dəyərli insan kapitalını” texnologiya ilə əvəz etdiyini və təsirlənəcək əməkdaşlara əvvəlcədən açıq və dəqiq bildiriş veriləcəyini bildirib.

Standard Chartered Plc-nin CEO-su Bill Winters bankın işçi qüvvəsinin gələcəyi ilə bağlı açıq mesaj verib. O, Sİ-yə keçidin bankın “aşağı dəyərli insan kapitalını” texnologiya ilə əvəz etməsi nəticəsində minlərlə vəzifəni aradan qaldıracağı barədə xəbərdarlıq edib.

Bank əməliyyatlarını sadələşdirmək üçün Sİ-dən daha geniş istifadə etməklə 2030-cu ilədək dəstək heyətinin 15 faizindən çoxunu azaltmağı hədəfləyən planını açıqlayıb. Ötən ilin sonunda bu cür vəzifələrdə təxminən 52 min nəfər çalışan bankın Hindistan, Çin, Polşa, Sinqapur və Honq Konqda fəaliyyət göstərən şəbəkəsi var.

Winters çərşənbə axşamı Honq Konqda keçirdiyi mətbuat konfransında deyib: “Bu, xərclərin azaldılması deyil. Bəzi hallarda daha aşağı dəyərə malik insan kapitalını qoyduğumuz maliyyə kapitalı və investisiya kapitalı ilə əvəz etmək deməkdir”. Winters qərardan təsirlənəcək əməkdaşlara əvvəlcədən “açıq və dəqiq bildiriş” veriləcəyini qeyd edib.

Winters bildirib: “İş itkilərimiz yoxdur, lakin maşınların xeyrinə iş rollarında azalma yaşayırıq və bu vəziyyət Sİ-yə doğru irəlilədikcə sürətlənəcək”.

Sİ texnologiyasının yayılmasının sürətlənməsi bu texnologiyanın təsiri ilə bağlı ictimai narahatlığın artdığı dövrə təsadüf edir. Pew Araşdırma Mərkəzinin məlumatlarına görə, ABŞ-də yetkinlərin yarısı Sİ-nin yayılmasına görə həyəcanlanmaqdan çox narahat olduqlarını bildirib. Enerji istehlakı yüksək olan məlumat mərkəzlərinin tikintisinə yerli etirazlar da güclənib.

Bank sektorunun qabaqcıl sistemləri sürətlə mənimsəməsi qlobal tənzimləyici qurumların da diqqətini çəkir. Wall Street şirkətləri ABŞ administrasiyası rəsmilərinin rəqəmsal təhlükəsizlik boşluqlarını aşkarlamağa kömək etməsi üçün təşviq etdiyi addım çərçivəsində Anthropic-in Mythos modelini sınaqdan keçirməyə başlayıb.

Rəsmilər xəbərdarlıq edirlər ki, Sİ-nin geniş inteqrasiyası eyni zamanda bədniyyətli aktorları da gücləndirir. Onların sözlərinə görə, yeni nəsil kiberhücumlar qlobal maliyyə sektorunun üzləşdiyi ən kritik sistemli risklərdən birinə çevrilib.