Brent nefti 87,24 dollara düşdü

Neft qiymətləri dörd gün ardıcıl azalma göstərib. Brent neftinin qiyməti 87,24 dollara, ABŞ xam nefti WTI isə 81,67 dollara enib. Bu ucuzlaşmada İran və Oman arasında Hürmüz boğazının idarə olunması ilə bağlı danışıqlardan gələn müsbət siqnallar təsirli olub. Tərəflər boğazın yenidən açıla biləcəyi istiqamətində razılığa gəldiklərinə dair açıqlamalar verib.

Hürmüz boğazı qlobal neft və təbii qaz ticarətinin mühüm keçid məntəqəsidir. Müharibədən əvvəl dünya neft istehlakının təxminən beşdə birinin bu marşrutdan keçdiyi bildirilir. İranın müharibə səbəbindən keçidləri məhdudlaşdırması nəticəsində boğazdan keçən neft həcmi normal səviyyənin dörddə birinə enib.

Neft qiymətləri Hürmüzdəki proseslər fonunda təzyiq altında qalsa da, təchizatla bağlı narahatlıqlar davam edir. ABŞ Enerji İnformasiya Administrasiyasının məlumatlarına görə, dizel və qızdırıcı yanacaq ehtiyatları 21 avqust tarixinə 2,2 milyon barel azalaraq 103,4 milyon barelə düşüb. Bu, ilin bu dövründə qeydə alınan ən aşağı ehtiyat səviyyəsi kimi qiymətləndirilir. Yaxın Şərq və Rusiya-Ukrayna müharibələri dizel təchizatı üzərində təzyiq yaratmaqda davam edir.

Neft bazarının bundan sonrakı istiqaməti Hürmüz boğazındakı vəziyyətdən və regiondakı diplomatik danışıqların nəticələrindən asılı olacaq. Qətər Baş nazirinin bugün İrana edəcəyi səfərlə altı aydır davam edən münaqişənin başa çatdırılmasına yönəlmiş yeni təşəbbüslərin başlanması gözlənilir. Lakin tərəflər arasında atəşkəs şərtləri ilə bağlı hələ də ciddi fikir ayrılıqları qalır.