İran: Pakistan vasitəçiliyi ilə danışıqlar davam edir

İran Xarici İşlər Nazirliyinin sözçüsü İsmayıl Bəqayi Tehranla Vaşinqton arasındakı danışıqlarla bağlı mediada müzakirə aparmayacaqlarını bildirib və “Pakistan vasitəçiliyi ilə danışıqlar davam edir”, - deyib.

Bəqayi paytaxt Tehranda keçirdiyi həftəlik mətbuat konfransında gündəmə dair açıqlamalar verib.

Media üzərindən danışıqlar aparmayacaqlarını deyən Bəqayi bu ifadələri işlədib: “Pakistan vasitəçiliyi ilə danışıqlar davam edir. Bölgədə heç bir ölkə ilə düşmənçiliyimiz yoxdur. Lakin başda Birləşmiş Ərəb Əmirlikləri (BƏƏ) olmaqla, region ölkələri son hadisələrdən dərs çıxarmalıdır”.

ABŞ və İsrailin bölgədəki mövcudluğunun təhlükəsizlik təmin etmədiyini bildirən Bəqayi İsrail rəsmilərinin BƏƏ-yə səfərinin onlar üçün gizli olmadığını və məsələ barədə məlumatlı olduqlarını deyib.

Bəqayi Hörmüz boğazından keçid haqqı alınması ilə bağlı isə bunları qeyd edib:

“Hörmüz boğazı ilə bağlı mexanizm yaratmaq üçün Omanla təmasdayıq. Ötən həftə texniki heyətlər də görüş keçirib. Hörmüz boğazında naviqasiya təhlükəsizliyi üçün çox səy göstərmişik. Boğazdan keçid haqqı alınmasının hüquqi və məntiqi əsasları var. Hörmüz boğazı məsələsini yalnız iqtisadi ölçüyə endirmək məsələni sadələşdirmək və əsas diqqət nöqtəsindən uzaqlaşdırmaqdır”.

Ölkəsinin uranın zənginləşdirilməsi hüququnun Nüvə Silahlarının Yayılmasının Qarşısının Alınması Müqaviləsi (NPT) ilə tanındığını bildirən Bəqayi bu hüququn hələ də mövcud olduğunu qeyd edib.

Bəqayi dənizlərdəki təhlükəsizliyin zəifləməsinin ABŞ siyasətindən qaynaqlandığını vurğulayaraq bunları söyləyib:

“Rusiya və Çin dənizlərdəki təhlükəsizliyin zəifləməsinin və dəniz ticarətinə yönələn təhdidin ABŞ qaynaqlı olduğunu bilir. Dəniz ticarətinin sərbəstliyi məsələsində Çinlə eyni fikirdəyik. Dəniz ticarətində piratçılıqla problem yaradan ABŞ-dır”.

Bəqayi ölkəsinin iqtisadi təzyiq və təhdidlər qarşısında maraqlarından imtina etməyəcəyini, ABŞ-nin də bunu anladığını və mümkün hücuma necə cavab verəcəklərini çox yaxşı bildiklərini deyib.

Hörmüz boğazında Cənubi Koreya bayrağı altında üzən gəminin hədəfə alınmasına gəlincə, Bəqayi məsələ ilə bağlı araşdırmaların davam etdiyini bildirib.