SOCAR Comstock ilə 1.65 milyard dollarlıq tərəfdaşlıq qurur

SOCAR və ABŞ-də yerləşən Comstock Resources, Inc. strateji tərəfdaşlıq yaratmaq üçün Niyyət protokolu imzalayıb. Sazişə əsasən, SOCAR Comstock-un Legacy Haynesville hasilat aktivlərində 20% iştirak payı, Western Haynesville hasilat aktivlərində 15% iştirak payı və Pinnacle Gas Services LLC-də Comstock-un 73% mülkiyyət payının 15%-ni əldə edəcək. Razılaşdırılmış şərtlərə uyğun olaraq, investisiyadan 15% gəlir əldə edildikdən sonra SOCAR-ın Western Haynesville-dəki 15% payının 7.5%-ə enəcəyi gözlənilir. Zəruri alış qiyməti düzəlişləri nəzərə alınmaqla, sövdələşmənin ümumi dəyəri təxminən $1.65 milyard təşkil edir.

SOCAR sövdələşmənin maliyyələşdirilməsi üçün hazırlıq işləri aparır. Şirkət zəruri hökumət və üçüncü tərəf təsdiqlərindən asılı olaraq, 31 oktyabr 2026-cı ilədək yekun alqı-satqı sazişinin imzalanmasını, 31 dekabr 2026-cı ilədək isə əməliyyatın tamamlanmasını hədəfləyir.

Tərəfdaşlıq SOCAR-ın Comstock tərəfindən həm Legacy, həm də Western Haynesville yataqlarında inkişaf etdiriləcək gələcək imkanlarda proporsional iştirakını nəzərdə tutur. Hər iki şirkət Comstock-un təbii qazının beynəlxalq bazarlara çıxışını genişləndirmək üçün əməkdaşlıq edəcək. Comstock bütün hasilat aktivlərinin operatoru olaraq qalacaq və Pinnacle Gas Services LLC üzərində nəzarəti saxlayacaq. SOCAR-ın gələcək layihələrdə və satınalmalarda iştirakı yekun sövdələşmə çərçivəsində ayrıca sazişlərlə tənzimlənəcək.

SOCAR prezidenti Rövşən Nəcəf hər iki şirkətin təcrübəsinin birləşdirilməsini əməkdaşlığın genişləndirilməsi üçün möhkəm əsas kimi qiymətləndirib. Comstock-un sədri və baş icraçı direktoru M. Cey Allison bildirib ki, tərəfdaşlıq nüfuzlu beynəlxalq tərəfdaşı cəlb edir, Comstock-un borcunu azaldır və planlaşdırılan inkişafı tam maliyyələşdirir. Onun sözlərinə görə, bu mexanizm Comstock-a operator nəzarətini və mərhələli azalma mexanizmi vasitəsilə gələcək dəyər yaratmaq potensialını qorumağa imkan verir.